29 қарашада Украинаның экипажсыз катерлері Новороссийскідегі Каспий құбыр консорциумының (КТК) теңіз терминалының айлақ құрылғысын істен шығарды. Соның салдарынан мұнай тиеу тоқтатылды. Бұл жөнінде консорциумның баспасөз қызметі хабарлады.
“Новороссийск теңіз порты капитанының бұйрығына сәйкес, тиеу және басқа да операциялар тоқтатылды, ал танкерлер Каспий құбыр консорциумының акваториясынан шығарылды” деп жазылған КТК хабарламасында.
Баспасөз қызметінің хабарлауынша, КТК қызметкерлері мен мердігерлер арасында ешкім зардап шекпеген. Консорцуим айлақ құрылғысы жарылған кезде апаттық қорғау жүйесі "тиісті құбырларды қорғағанын", осылайша алдын ала мәлімет бойынша мұнай теңізге төгілмегенін айтты.
Ресейдің Краснодар өлкесінде дрон шабуылынан кейін мұнай өңдеу зауыты да өртенді. 29 қарашаға қараған түні украин дрондары Ресейдің он аймағы мен аннексияланған Қырымға шабуыл жасады. Ресей қорғаныс министрлігінің мәліметінше, түнде 103 дрон құлатылған.
Краснодар өлкесінде Афипский мұнай өңдеу зауытына шабуыл жасалған. Аймақтың жедел штабының хабарлауынша, зауыттың аумағында техникалық жабдық бүлінген, ешкім зардап шекпеген.
Новороссийскіге бұған дейін де украин дрондары шабуыл жасаған. Қарашаның ортасында украин дрондары Новороссийскідегі мұнай қоймасына соққы жасаған.
Новороссийскідегі әскери-теңіз базасында кемелер мен сүңгуір қайықтар шоғырланған. Ал ол жақтағы Каспий құбыр консорциумының (КТК) терминалы арқылы Ресей, Әзербайжан және Қазақстан мұнайы халықаралық нарыққа жол тартады.
КТК – Қазақстан мен Ресей және әлемдегі жетекші мұнай өндіруші компаниялар қатысатын аса ірі халықаралық жоба. Құбырдың ұзындығы 1,5 мың шақырым. КТК негізінен Батыс Қазақстан мұнайы мен Ресей мұнайын тасымалдайды.