Каспий құбыр консорциумының инфрақұрылымына шабуылдан кейін Қазақстан энергетика министрлігі мұнайды халықаралық нарыққа балама жолдармен жіберу жағын қарастырып жатқанын мәлімдеді.
“Теріс салдарын азайту және ірі кен орындарындағы өндіріс қарқынын сақтау мақсатында, министрлік экспорттық көлемді балама бағыттарға қайта бағыттау бойынша жедел жоспарды іске қосты” деп жазылған ведомствоның сенбі күні кешке таратқан хабарламасында.
Министрлік хабарламасында “азаматтық маңызы бар инфрақұрылым нысандарына бағытталған мұндай әрекеттерге жол берілмеуі тиіс” деп жазған.
29 қарашада Украинаның экипажсыз катерлері Новороссийскідегі Каспий құбыр консорциумының (КТК) теңіз терминалының айлақ құрылғысын істен шығарды. Соның салдарынан мұнай тиеу тоқтатылған еді.
Новороссийскіге бұған дейін де украин дрондары шабуыл жасаған. Қарашаның ортасында украин дрондары Новороссийскідегі мұнай қоймасына соққы жасаған.
Новороссийскідегі әскери-теңіз базасында кемелер мен сүңгуір қайықтар шоғырланған. Ал ол жақтағы Каспий құбыр консорциумының (КТК) терминалы арқылы Ресей, Әзербайжан және Қазақстан мұнайы халықаралық нарыққа жол тартады.
КТК – Қазақстан мен Ресей және әлемдегі жетекші мұнай өндіруші компаниялар қатысатын аса ірі халықаралық жоба. Құбырдың ұзындығы 1,5 мың шақырым. КТК негізінен Батыс Қазақстан мұнайы мен Ресей мұнайын тасымалдайды.
Қазақстан билігі "балама бағыттардың бірі" деп Қазақстанның Ақтау портынан Әзербайжанға, одан ары қарай Грузия мен Түркияға мұнай тасымалдайтын Баку-Тбилиси-Жейһан құбырын айтып отыр. Қазақстан кейінгі кезде бұл бағыт бойынша мұнай тасымалдауды ұлғайтқан, алайда Каспий құбыр желісімен жөнелтілетін мұнай көлемі одан әлдеқайда көп.
