Ұшақ құрастырушы еуропалық Airbus компаниясы A320 тобына жататын ұшақтардың компьютерлік бағдарламасын дереу жаңартуды талап ететін бұйрық шығарды. Компания қуатты күн сәулесі бағыт алуға қажет деректерді бұрмалауы мүмкін екенін айтты.
"A320 тобына жататын ұшақта жуырда болған оқиға сарапталғаннан кейін қуатты күн радиациясы ұшуды басқару жүйесінің жұмысы үшін маңызды деректерді бұрмалауы мүмкін екенін көрсетті. Нәтижесінде бұл Airbus A320 тобына жататын ұшақтардың айтарлықтай бөлігіне әсер етуі мүмкін екені анықталды" деді компания өкілдері.
Компанияны осындай қадамға мәжбүрлеген оқиға 30 қазанда JetBlue әуе компаниясының Канкун–Ньюарк бағыты бойынша ұшқан рейсі кезінде болған. Ұшақ күрт төмендеп, Флорида штатының Тампа қаласына шұғыл қонуға мәжбүр болған. Кемінде 15 жолаушы жарақат алған.
Қазақстандық Air Astana компаниясы Airbus компаниясының бағдарламалық жабдықтауды дереу жаңартуына байланысты кейбір рейстердің кешігуі немесе ұшу уақыты өзгеруі мүмкін екенін ескертіп, хабарлама таратты. Әуе компаниясы мұндай шара ұшу қауіпсіздігін қамтамасыз ету мақсатында жүргізіліп жатқанын айтты.
Ал Қазақстанның азаматтық авиация комитеті Air Astana және FlyArystan әуе компанияларында программалық жабдықтау жаңартылып жатқанын хабарлады.
"Қазіргі уақытта инженерлік қызметтер Air Astana және FlyArystan авиакомпанияларының KC 931 және FS 7063 рейстеріне тартылған екі әуе кемесінде бағдарламалық қамтамасыз етуді жаңартты. Қалған әуе кемелерінде жаңарту жұмыстары жоспарлы кезең-кезеңімен жалғасып жатыр және жуық арада толық аяқталады. Барлық процедуралар Airbus ұшу жарамдылығы жөніндегі директивасына қатаң сәйкестікте, авиакомпаниялар мамандарының, Азаматтық авиация комитеті мен Қазақстанның авиациялық әкімшілігінің тікелей бақылауымен жүргізіліп жатыр. Барлық қызметтер тәулік бойы жұмылдырылып, жаңарту процесін мүмкіндігінше тез аяқтау және әуе қауіпсіздігін толық қамтамасыз ету бағытында жұмыс істеп жатыр" деп жазылған хабарламада.
Ведомство жолаушыларды ұшақтардың кестесін алдын ала тексеруге үндеді. Ақпаратқа қарағанда, FlyArystan – 28 ұшағы, Air Astana-ның 30 ұшағының бағдарламасы жаңартылып жатыр.
Қазақстандықтар әлеуметтік желіде кейбір рейстер кешіккенін жазды. Жолаушылардың айтуынша, мысалы 28 қараша сағат 22:30-да ұшуы тиіс болған Астана – Алматы рейсі сол күйі ұшпаған.
Reuters-тің хабарлауынша, әлем бойынша 6 мың ұшақтың бағдарламасы жаңартылады, бұл әлемдегі осы модельдің жартысына жуығына қатысты.